يا بنت الناس
يابنت الناس
غريب حِسِك؟
ومن حِسِك
عرفت خلاص
عفريت الهوى مسك
جنانك حبة يهديكي
ويشهد إن أنا ليكي
وقلبي يقول : قلبك من مماليكي
ولاوصف البُلغًا يكفي
ولاسكر مصر يحليكي
يابنت الناس
يابنت الناس
الحب مايفرق مابين
أهل الفالصو وأهل الماس
ولايفرق حبيب عشانه وحيد
ولايفرق حبيب ونًاس
يابنت الناس
فقير الهوى يحكيلك
ولو ماتوا مراسيلك
أنا آجيلك
ولو عيبتي على سني
حديث الهوى احلفلك
وأقول والله أنا أجيلك
ولو قلتي مشيتي خلاص
برده هناديلك
دا أنا شمعة
تنور في ليل العشق قناديلك
ولو كنتي غريبة
والسنين غربت قلبي عن قلبك
سيوف الهوى تتسن وتتسم
وأسرع من الهوا أحاربك
أسيب الحرب شغالة
وأطير فــ عيونك
وأعيش اللحظة والحالة
وتجري بعيد
لكن على مين
دا أنا ماشي على دربك
يابنت الناس
قوية وقوتك ضعفك
طاقية الاخفى تخفيكي
لكن على مين ؟
أنا شايفك
وحابسه الدمعة فـي
عنيكي
الكلام ده على غيري
دا أنا عارفك
في لحظة والتانية بتغيري
ولاعمرك
تطيري في هوا غير
هوى طيري
يابنت الناس
بحبك كلمة مش عارف
أجيبها منين
ولو حبك قاموس فدادين
هفك كلامه جوه الطين
وأزرع حبه تحييكي
وتكتب كلمة وياها
وحبر الكلمة دمع العين
بعلو الصوت
حبيبك نفسه يفديكي
ولو كانت حياتي فراق
وما يجَمعنا غير الموت
فأهلا بيه
أنا قاعد ومستنيه
ومستنيكي
يابنت الناس
مسدس صغير
4 التعليقات:
قرأتها قبل كده
لكن لسه النغمة فى ودني
إنت شاعر بجد
علي فكرة أنا من الناس اللى مبحبش أقرأ شعر عامي خالص
ومحستش إنه شعر غير مع ناس قليلة جداً
زي فؤاد قاعودة وصلاح جاهين وبيرم التونسي وسيد حجاب
وبجد إنت إديتني كمان الإحساس ده
الله ياصلاح
تحفه بجد
المجله بتظهر المواهب اهي :)
يابنت الناس
بحبك كلمة مش عارف
أجيبها منين
ولو حبك قاموس فدادين
هفك كلامه جوه الطين
وأزرع حبه تحييكي
وتكتب كلمة وياها
وحبر الكلمة دمع العين
كل ما اقراها احبها اكتر والله
عارف والله العظيم الواحد شايف منير قدامه بيغنيها
الاغنيه ومش هقول شعر
لا دي اغنيه
تحفففففه يا متر
انت بقيت محامي ازاي
قال مسدس قال
ودي
جميل العاميه بتاعتك ماشاء الله
بس محسسنى انك زهقت منها وكل شويه يانت الناس
زي ماتكون بتقولها افهمى بقه ياشيخه
إرسال تعليق