جمهورية شقلوبستان العربية (الحلقة الثانية)

على إحدى مقاهى شقلوبستان الشعبية تجد الأستاذ حاقد عبد الكريم مدرس رياضيات ينظر فى إحدى الجرائد وعلى وجهه ترتسم ملامح تكشيرة أثرية من العصور القديمة يبدوا أنها لن تفارقه منذ ولادته , ويقرأ أخباراً فى صفحة الحوادث عن تهم فساد ورشاوى وإهمال فيتمتم : ولاد الكلب واكلينها والعة وخاربين البلد , كل حاجة بقت بالرشوة وكله بالفلوس حسبنا الله ونعم الوكيل , ميعرفوش إن الراشى والمرتشى فى النار .. أه يا كفرة , بينما يتصاعد فى الخلفية صوت إقامة صلاة الظهر .

يقلب الصفحة ليجد أخر أخبار الحكومة الشقلوبستانية وأخر إنجازاتها فينفخ فى ضيقٍ وضجر قائلاً شوف يا أخى النفاق ناس معندهاش لا مبادىء ولا ضمير , بيبيعوا الكلام.

يرتشف أخر (بق) من كوب الشاى بصوت فحيح مستفز وينادى يا واد مسعد حسابك أهوه أنا رايح عندى حصة فى المدرسة وكمان بالمرة ألحق أمضى إنصراف.

يدخل الفصل ويبدأ فى كتابة الدرس على السبورة بينما يلهث التلاميذ خلفه بأقلامهم للحاق به , ينتهي ثم ينادى بصوت لن تجد مثيله بين البشر : اللى معملش الواجب يقف , يقلب فى وجوه التلاميذ وينادى اقعد انت وانت كمان وانت ياللى هناك اقعد

ويفضل فى الأخر 3 طلاب مبياخدوش عنده درس هيكون نصيبهم علقة سخنة.

وينتهى المشهد بدخول الناظر ليبدأ فاصل التثبيت , قوم يا ابنى انت وهوه لحضرة سعادة الناظر , يا فندم الفصل نور .. لا فصل إيه دى المدرسة .. دى مديرية التربية والتعليم كلاتها نورت بقدوم جنابك ,

يا أستاذنا إحنا عصافير فى قفص صدر سيادتك .

تعود الشعب الشقلوبستانى منذ قديم الأزل على رمى التهم والمصايب على حكامهم ,

ونحن هنا لسنا بصدد الدفاع عن الحكام ولا حتى بصدد الهجوم عليهم ولكن ..!!

لو تأملنا مثال من الشعب ده زى الأستاذ حاقد

فنجده لم يتورع أبداً فى وصف المرتشين بإنهم كفرة ومع ذلك لم يحرك ساكناً مع صوت المؤذن خلفه.

الأستاذ حاقد صب جام غضبه على المهملين ومع ذلك ترك المدرسة علشان يقعد على القهوة.

الأستاذ يكيل التهم للطغاة والمستبدين والمنتفعين بسلطاتهم ومع ذلك لم ينسي إنه أحد صور هؤلاء البغاة فى دولته الصغيرة اللى هيه فصله , وإن الدروس الخصوصية اللى تخليه يفضل بين التلاميذ تبقى رشوة هيه كمان.

الأستاذ حاقد يلوم منافقى الصحف ولم يجد حرجاً فى نفاق الناظر والمدير ووكيل الوزارة وكل اللى فوقيه.

يبقى ليه بنعيب على المسؤلين بقى؟

إحنا بنعمل كل حاجة همه بيعملوها لكن على قدنا وعلى قد سلطاتنا

المدير فى المدرسة بيتسلط على الناظر والوكلاء ودول بيتسلطوا على المدرسين والمدرسين بيفشوا غلهم فى الطلاب.

وهكذا فى الشركات والمصانع والهيئات الحكومية وو ... الخ

علشان كده مش من حق أى واحد من دول إنه يشتكى من الظلم أبداً ..

بقلم . د/ ياسر عمر عبد الفتاح